6 თვე მეცხრე არხზე

რამდენიმე დღეში ზუსტად 6 თვე შესრულდება, რაც მეცხრე არხზე დავიწყე მუშაობა. ვერც კი გავიგე, ეს დრო ასე უცებ როგორც გავიდა.

ტელევიზიაში აქამდე არ მიმუშავია. თავიდან რომ მოვედი, მეგონა, რომ დიდ გაუგებრობაში მოვხვდი: არა ნორმირებული სამუშაო დღე, ყველა გადარბენაზე, მკაცრი დედლაინები, ერთ დღეში მოფიქრებული და განხორციელებული იდეები, ბოლო წუთს შეცვლილი გადაწყვეტილებები… ასეთი სტრესი სხვა სამსახურებში არ მქონია. თუმცა ადამიანი ყველაფერს ეჩვევა.

 ნათია ლაზაშვილმა 30 აპრილს ეთერში გაიყვანა “მეცხრე არხი” 9 საათიანი საინფორმაციო გამოშვებით. საინფორმაციოს დასრულებას ნიუსრუმი ოვაციებით ხვდება.

ძნელია გაიხსენო 6 თვით ადრე მომხდარი მოვლენები, ქრონოლოგიურად, დეტალურად, ემოციურად, თუმცა არის რაღაცები, რაც არასდროს დამავიწყდება. ადამიანები, მოვლენები, სიტუაციები… ისეთი მრავლის მთქმელი და დაუვიწყარი, რომ ალბათ ყოველ დღე რომ მეწერა დღიურები მათ შესახებ, მაინც ბოლომდე ვერ გამოვთქვამდი… ჩემს აღფრთოვანებას, ჩემს ემოციებს, ჩემს აღტკინებას, ხანდახან იმედგაცრუებებსა და დაღლილობას, ხანდახან კი უსაზღვრო ბედნიერებას.

 საცდელი მაუწყებლობის პირველი დღე. საღამოს ათი საათი. დაღლილ-დაქანცულები ეზოში შამპანურით და ტორტით აღვნიშნავთ საცდელ ეთერში გასვლას.

მეცხრე არხში მარკეტინგის დეპარტამენტი მაბარია. ამაში იგულისხმება ყველაფერი, რაც “მეცხრე არხის” ბრენდს და შეფუთვას შეეხება. როგორც ეთერში, ისე ონლაინ და offline პლატფორმებზე.

პასუხისმგებლობა დიდია, მაგრამ საქმე იმდენად საინტერესო და ისეთ დიდ გამოცდილებას ვიღებ, რომ არ მეშინია არაფრის. არც გრძელი სამუშაო საათების (ყოფილა შემთხვევა დილის 5 საათზე გავსულვარ ოფისიდან), არც დროებითი წარუმატებლობების.

ვთვლი, რომ ტელევიზიაში მუშაობამ ძალიან გამზარდა. ამ ხნის განმავლობაში გავაკეთე ისეთი მნიშვნელოვანი და საპასუხისმგებლო რაღაცები, რაც ვერასდროს წარმოვიდგენდი, თუ 25 წლის გოგოს შეეძლო ან ანდობდნენ. ხანდახან უკან რომ ვიხედები, ახლაც მიკვირს, როგორ მოვაღწიე აქამდე, რაც მთავარია, ცოცხალმა და ჯანმრთელმა. და თითქოს ნერვებიც ჯერ კიდევ მთელი მაქვს.

ძალიან რთული ყოფილა ტელევიზიის აწყობა. ჩვენ კი თითქმის შეუძლებელი შევძელით. თითქმის 24 საათიანი რეჟიმის და ენით აღუწერელი შრომის წყალობით 2 თვეში საცდელი მაუწყებლობა ჩავრთეთ.

თავიდან იყო დღეები, როდესაც რამდენიმე დეპარტამენტის საქმესაც კი ვითავსებდი. ჩემს განყოფილებაშიც არ მყავდა საკმარისი ადამიანები, ვისაც ნაწილ საქმეებს გადავაბარებდი. ახალი ადამიანების აყვანასაც დრო და ძალისხმევა სჭირდება. სანამ შეეგუებიან ახალ გარემოს, სანამ ჩაჯდებიან ორგანიზაციის კალაპოტში. შეუძლებელია, აიყვანო თანამშრომელი და მან მეორე დღესვე ჩამოგაცილოს გარკვეული საქმეები. ახალი თანამშრომლების ორგანიზაციაში ინტეგრირებისთვის რამდენიმე თვეა საჭირო. მითუმეტეს, თუ კრეატიული საქმის კეთება უწევთ.

ხანდახან გადაღლილობისგან, უდროობისგან და უამრავი საქმისგან სასოწარკვეთილიც ვყოფილვარ, ბევრჯერაც მიტირია და ასეთი ჩანაწერებიც მიკეთებია სამუშაო ბლოკნოტში:

მაგრამ ყოველთვის ვიხსენებდი, რომ ძლიერი, მიზანდასახული, ჭკვიანი და წარმატებული ვარ. რომ სასოწარკვეთა არ შემეფერება. ამიტომ თავს მაღლა ვწევდი და ამის შემდეგ ყოველთვის ვპოულობდი გამოსავალს.

ძალიან მეხმარებოდნენ თანამშრომლები, რომლებიც ამ ხნის განმავლობაში მეგობრებად იქცნენ. მადლობა თითოეულ მათგანს!

image

ასევე ძალიან მეხმარებოდა ბუნებასთან ურთიერთობა. ბედად ტელევიზიის ახლანდელ შენობას კარგად გამწვანებული ეზო აქვს, სადაც მთელი ზაფხულის განმავლობაში ულამაზესი ყვავილები ყვავიან. ხშირად გავდიოდი გარეთ ყავის ჭიქით ხელში.

გარდა იმისა, ვიზუალურადაც შევიცვალე. გავხდი ვეგეტარიანელი, დავიკელი 5 კილო, შევიცვალე ვარცხნილობა და ჩაცმის სტილი.

ეს არის ექვსი თვის წინანდელი ფოტო:

ეს არის გუშინწინდელი ფოტო:

ტელევიზიამ წარუშლელი შთაბეჭდილება მოახდინა ჩემზე და უდიდესი გავლენა იქონია ჩემს ცხოვრებაზე.

მეცხრე არხი – ეს ერთი დიდი ოჯახია, ყველაზე მამაცი, გულწრფელი, თავგანწირული და სამართლიანი ადამიანები… და მადლიერი ვარ, რომ ამ ოჯახის წევრად ვითვლები.

20 Comments

  1. აი ვიცი რომ ჭკვიანი და წარმატებული ხარ და ასეთი საშინელი ტელევიზია რატომ გაქვთ?

    1. მე არ ვთვლი, რომ საშინელია. პირიქით, 6 თვის ტელევიზიის კვალობაზე, სასწაულად კარგია.

      1. თავად ბევრად უკეთესი აქვს და იმიტომ ასე ცინიკურად, ალბათ :) მომეწონა პოსტი :)

  2. მეც გადამიტანია საშიელი დღეები, ღამეები მითენებია და უამრავი სტრესული სიტუაცია მქონია, ხშირად მშველოდა საკუთარი თავის გამხნევება: შენ ყველაფერი გამოგივა, შენ ყველაფერი გამოგივა! ან ახლა, ან არასდროს, ან ახლა ან არასდროს! ახლაც ასე ვაგრძელებ იმაზე ფიქრით, რომ ეს უდიდესი ტრამპლინია ჩემს ცხოვრებაში…

  3. კიდევ ბლოგზე აღვწერდი ხოლმე პარალელურად თითოეულ სამუშაო დღეს, მთელ ემოციას აქ ვაფრქვევდი, ყველაფერი დრაფტებში მაქვს და თვალს რომ ვავლებ, მეღიმება :)

  4. და ბოლოს, მეც 6 თვეა რაც აქ ვმუშაობ და თითქოს საკუთარ თავზე ვკითხულობდი აქ რაც წერია, როგორ მესმის ეს ყველაფერი და რამდენჯერ მიტირია, ვაი… უჰ, მთავარია, რომ რაღაც გადავლახე და ახლა მთავარია ამ ყველაფრის შენარჩუნება და წინ წასვლა :)

  5. კარგია ასეთი ცვლილებები :)
    სამწუხაროდ, როგორც ჩანს სტრესის გარეშე მნიშვნელოვანი არაფერი არ გამოდის, სამაგიეროდ უკან არ დახევა სხვა ადამიანებისგან გამოგარჩევს. ასე რომ, წარმატებებს გისურვებ :)

  6. ცოტ-ცოტა ალბათ ყველას წაგვიტირია. ეგ არაფერი, ტკბილია ეგ ცრემლები :)

  7. მართალს ამბობ: შენ ძლიერი, მიზანდასახული, ჭკვიანი და წარმატებული ხარ, მარიამ. ჩემი მხრიდან ერთ ეპითეტსაც დავამატებდი – საყვარელი :) მიხარია, შენი ადგილი რომ იპოვე. თუმცა მწყინს კიდეც: მე-9 არხმა გიპოვა და pink.ge-მ დაგკარგა… მაინც წარმატებებს გისურვებ. ძალიან მსიამოვნებს, ასეთს რომ გიყურებ :*

  8. და… მეორე მარიამიც რომ მანდ გყოლია!
    როგორ მიყვარს ეგ არაჩვეულებრივი ადამიანი… მომენატრა თავისი უგზოუკვლოდ ნიჭიერი და უცერემონიო კომენტარებით… ვარდისფერ ოთახში ))))))))

  9. როგორ მიხარია, რომ ბლოგი გაიხსნა და აი იმხელა სიამოვნებით ჩავუჯექი წაუკითხავ პოსტებს.

    და მიხარია და ვამაყობ შენი წარმატებებით <3

  10. ტელევიზიაში მუშაობა ჩემი აუხდენელი ოცნებაა :) კარგია რომ მოხვდი, ის მრავალფეროვანი, სიახლეებით დატვირთული, საინტერესო სამსახური სადაც დიდ გამოცდილებას იღებ და ამავე დროს საკუთარი თავის რეალიზებას შეძლებ ბევრი არაა. ასე რომ გაგიმართლა :)

    ისე, საინტერესოა როგორ მოხვდი მანდ :) დაწერე თუ არ დაგეზარება :)

    წარმატებებს გისურვებ :)

    1. როგორ მოვხვდი და ყოფილმა დირექტორმა ინტერნეტით აღმომაჩინა :)

Leave a Reply

This site uses Akismet to reduce spam. Learn how your comment data is processed.