ერთ-ერთი იმ ფილმთაგანია, რომლის გამოსვლასაც ძალიან ძალიან ველოდები.

ზოგადად ძალიან მომწონს დისნეის ახალი პროექტები, როგორც 3D ანიმაციის, ისე – ფილმების კუთხით. მგონი ეს ფილმი რაღაც საშუალოა ორივე ჟანრში.

ველი, რომ იქნება ძალიან ლამაზი, საინტერესო და ორიგინალური სიუჟეტით და რაც მთავარია, პრინცესა ავრორა, რომელიც ყველა მუტფილმში და ეკრანიზაციაში თითქოს “უსულო” და “უტვინო” პერსონაჟია, აქ ცოტა სხვაგვარად დაგვანახებენ.

მოკლედ 5 ივლისიდან, საქართველოს კინოთეატრებში, სასურველია ინგლისურ სეანსზე… :)

დღეს ჰარი პოტერის ბოლო ფილმის პრემიერაზე ვიყავი! ფილმის დაწყებამდე ჯადოსნური ღონისძიება გაიმართა.

დარბაზის შესასვლელში წითელი ხალიჩა დაეგოთ და მანტია შემოსხმული, ქუდიანი ჯადოქრები ჩირაღდნებით ხელში ეგებებოდნენ პრემიერაზე მოსულ ჰარი პოტერისტებს. მეორე სართულზე კი სტუმრებს სანთლებით სუსტად განათებული მაგიდა, ცოცხალი ბუს გალია, “მფრინავი” ცოცხების სკივრი, უზარმაზარი შოკოლადის ტორტი წარწერით “ჰარი პოტერი” და ბერტი ბოტის მრავალნაირი გემოს კანფეტების დიდი კალათი დახვდათ.

თვითონ ფილმით აღფრთოვანებული და შთაბეჭდილებების ქვეშ ვარ! განსაკუთრებით იმის გამო, რომ რამდენიმე კულმინაციურ მომენტში დარბაზმა მქუხარე აპლოდისმენტები მოსცხო! პრემიერას ყველა ასაკის მაყურებელი ესწრებოდა. იყვნენ 5 წლის ბავშვებიც და 50 წლის მშობლებიც. საგულისხმო კი ის იყო, რომ ყველას ერთნაირად უხაროდა იქ ყოფნა. ბავშვი და დიდი ყველა ერთნაირად აღიქვამდა ეკრანზე განვითარებულ მოვლენებს. დარბაზი სუნთქავდა, როგორც ერთი ორგანიზმი.

სტუდენტები გაიზარდნენ, პროფესორები დაბერდნენ, ვოლდემორი აღარ არსებობს.
ეს არ იყო უბრალოდ ფილმის ჩვენება, ეს იყო ეპოქის დასასრული. ძალიან ემოციური იყო. ბევრმა იტირა კიდეც. ნაწილობრივ მძაფრი სიუჟეტის გამო, ნაწილობრივ კი იმიტომ რომ – ამ ფილმით ჰარი პოტერის ჯადოსნური სამყაროს კარი სამუდამოდ დაიხურა.

10 წელი გავიდა, არც კი მჯერა. დრო რა სწრაფად გადის…

P.S. დღეს რაღაც აპლიკაცია ვიპოვე, რომელიც გეუბნება თუ რომელია შენი პატრონუსი. ჩემი გამოვიდა ფენიქსი. სხვაგვარად ვერც ვიფიქრებდი. :)

მაღვიძარა. თბილი ბალიში. დილის სუსხი.
ფინჯანი. ყავა. შაქარი. კოვზის წკარუნი.
ონკანი. ფინჯანი. გამოფხიზლება.
პერანგი. შარვალი. ფეხსაცმელი. სავარცხელი.
ტაქსი. თვლემა.
სალმები. ქალმები.
გამოტენილი ტვინი.
გამოტენილი დღის განრიგი.
ტელეფონის ზარები. დედლაინები.
ხვატი. გამონაბოლქვი. ქალაქი. ხმაური.
ლანჩი. ცხარე. გემრიელი.
მეგობარი. ქაქანი. ემოციები.
ოფისი. კონდინციონერი.
კორპორატიული ვალდებულებები.
ტელეფონის ზარი. შეხვედრა. იმეილი.
პრეზენტაცია. ტელეფონის ზარი. ესემესი.
ყავა. პროექტი. ყავა. ენერგია. გულის ტკივილი. დაღლილობა.
ტაქსი.
მასაჟი. თვითშთაგონება. კრიტერიუმები. პარამეტრები. სილამაზე. მსხვერპლი. ტკივილი.
ტაქსი.
ლექცია. ცოდნა. დიპლომი. ნიშნები. რეიტინგი. ამაყი დედა. დაქანცულობა.
ტაქსი.
პიჟამო. ლოგინი. ძილბურანი. ფიქრები.

სამყარო. დაბადება. ცხოვრება. გარდაცვალება.

ამაოება.

რამდენ სერიალს და ფილმს ვუყურებთ, არა?

ვუყურებთ, გვიყვარდება, ვეჯაჭვებით, გავლენის ქვეშ ვექცევით, ვბაძავთ, ქვეცნობიერში გველექება მათი მანერები, ქცევები, ხმის ტემბრი, გარდერობი, ჩვევები, კარგი და ცუდი თვისებები… ზოგჯერ აღმოვაჩენთ ხოლმე რომ თურმე როგორ გვგავს, თურმე რამდენი საერთო გვაქვს, თურმე ჩვენც ხანდახან ასე ვიქცევით, თურმე როგორები ვყოფილვართ გვერდიდან…
და მათი ძლიერი თუ ნაკლოვანი მხარეები საკუთარ თავზეც გაფიქრებინებს – “ნეტავ მე როგორი ვარ?”

ბეტი სუარესი (Ugly Betty)

ბეტი კეთილი და შრომისმოყვარეა. ის ცდილობს დაეხმაროს ყველას, ვისაც მისი დახმარება ესაჭიროება (და არა მარტო). ხშირად ეხვევა ისეთ უსიამოვნებებში, სადაც მას არაფერი ესაქმებოდა. მას განსაკუთრებულად ესმის მეგობრობა და არასდროს სწირავს ადამიანებს, რომლებიც ყოველდღიურად ცხოვრებას უმწარებენ.

ვინმე იტყოდა, რომ მას სხვის საქმეებში ცხვირის ჩაყოფა სჩვევია. მე ვიტყოდი, რომ მას სურს სამყარო უკეთესი იყოს.

რეიჩელ ბერი (Glee)

რეიჩელი ამბიციური და დრამატულია. მას მიაჩნია, რომ დედამიწა მის გარშემო ტრიალებს და ყოველთვის ყურადღების ცენტრში მოხვედრას ცდილობს. ის ღრმად არის დარწმუნებული, რომ ოდესმე ძალიან, ძალიან ცნობილი გახდება, თუმცა ამის მიღწევას მხოლოდ საკუთარ ნიჭზე დაყრდნობით და მუხლჩაუხრელი შრომით აპირებს…

ვინმე იტყოდა, რომ ის თავკერძა და ამპარტავანია. მე ვიტყოდი, რომ მას საკუთარი ძალების გულწრფელად სჯერა.

გაბრიელ სოლისი (Desperate Housewives)

გაბრიელი თავდაჯერებული, ძლიერი და შეუპოვარია. ცდილობს გარშემო ყველაფერი აკონტროლოს, რადგან სასტიკად არ უყვარს მოულოდნელი უსიამოვნებები. თუმცა დაბრკოლებები მას არ აშინებს, მხოლოდ აძლიერებს და მტრებსაც მუდამ საკადრისად უსწორდება.

ვინმე იტყოდა, რომ ის უხეში და სასტიკია, მე ვიტყოდი, რომ ის თავს კარგად იცავს.

შარლოტ იორკი (Sex and the City)

შარლოტა მიამიტი, მეოცნებე და რომანტიკოსია. მას აქვს უცნაური იუმორის გრძნობა, უყვარს პირად ურთიერთობებში საკუთარი თავისთვის წესების და შეზღუდვების დადგენა, ცხოვრობს საკუთარ მოგონილ ვარდისფერ სამყაროში და ცხოვრებისეული სიძნელეების მიუხედავად, გულწრფელად სჯერა, რომ აუცილებლად გამოჩნდება “ის” ერთადერთი, ვინც მას ბედნიერს გახდის.

ვინმე იტყოდა, რომ ის ინფანტილური ოპტიმისტია. მე ვიტყოდი, რომ მართლა “აუცილებლად გამოჩნდება”.